சாபம் 2

மழையில் நனைந்தால்
காய்ச்சல் வந்ததுண்டு - இன்றோ
காதல் வந்துவிட்டதடி

கர்வத்துடன் வெளிப்படுத்திய எனக்கு
கவலை தோய்ந்த
கடைக்கண் பார்வையே
கடைசியில் கிடைத்தது

கண்டதும் காதல்
கடைசி வரை நம்பவில்லை
உனை காணும் நொடி வரை

நேற்றோடு நாற்பது நாட்கள்
விழியின் விதியில் வீழ்ந்து
ஞாபகப்படுத்தினாய்
எனக்கென்னமோ நாட்களில்
நம்பிக்கை இல்லை

சட்டென மண்டியிட்டு
மன்னிப்பு கோரினேன்
என்னவென்று பதறினாய்
தாமதமாய் உனை
கண்டதற்கென்றேன்
கண்ணடித்து

காதலுக்கு கண்ணில்லையாம்
காதலை காணதவன் சொன்னது
பிறகெப்படி கண்ணீர் வந்தது

சாபம்

எத்தனை ஆண்டு தவமோ
கதறிக்கொண்டு உன் வீட்டு
தாழ்வாரத்தில் விழுகிறது
மழை

மழை நீரில் கை நீட்டாதே
உன் மீது பட்ட துளிகள்
மூச்சை இழுத்துக்கொண்டு
குமிழியாய் அலைகிறதாம்

குமிழிக்கு சாப விமோசனம் தர
நீ கால் நனைக்கும் அழகில்
எனக்கேற்பட்டதடி
காதல் சாபம்